si bon luy semble, ou bien l’un après l’autre, et ayant tous dit, leur marquera leur leccon à tous jusques où ils devront tous redire à l’aultre leccon. Ainsi il fera consécutivement à tous ceux qui lisent en épelant et de l’absay. Et ceux qui laisseront leurs matines pour prendre le Donnet ou rudiment, diront tous les matins ensemble leurs heures scavoir : un matin une partie et l’autre vespres et sept psalmes, et ce l’espace de deux ou troys moys apres qu’ils les auront laissés, de peur qu’ils ne oblyent, et pour les y rendre plus promts à les dire.
Les grammairiens diront leurs leccons et textes par chœur et construction deux fois le jour, scavoir devant et après midy.
En chacune classe et leccon celuy que le régent jugera plus capable et mieux estudiant sera maistre sur ses compaignons de sa classe et leccon, et tous ceux de sa leccon seront tenuz luy rendre et dire leur leccon premier que de la dire au régent ; et s’ils y font faulte, il en rendra conte et les accusera au régent, et du nombre des faultes qu’ils y auront faictes, de quoy le dit régent souvent l’interrogera, et principalement devant que de les faire dire.
Et s’il y a quelqun des aultres compaignons qui étudient mieux que luy, il le mettra à sa place et l’aultre sera tenu de luy obéir et lui rendra ses leccons devant que les dire au régent.
Ledit premier en chacune classe et leccon aura droit de dire le premyer et de faire dire et récitter la leccon à ses compaignons de sa dite classe et leccon, devant qu’ils les disent au régent, et de remarquer les faultes qu’ils font, tant es dites leçons qu’en leurs mœurs et comportement à l’escolle, pour en rendre compte audit régent.
Les escolliers de chacune classe et leccon seront retirés ensemble à part pour estudier et ne se mesleront avecque les aultres qui ne sont pas de leurs leccons, et mesme diront ensemble, le plus capable et mestre le premier, comme dit est.
Les escrivains liront et escriront à part, prendront exemple après les premières leccons, lesquels exemples leur seront baillés sur leurs leccons, s’ils lisent de grammaire au aultres choses ; lesquels escrivains seront tenus rendre leurs exemples et les dire
