saire à cause que l’avoir entendu, ne se rapporte pas au mesme cas que examiné, car s’il n’y avoit pas plusieurs cas pour ces deux verbes, ou qu’au moins ils fussent tous deux devant le verbe, ou tous deux aprés ; il ne seroit point nécessaire d’aucune répétion ; par exemple, on dira fort bien : nostre loy ne juge personne sans l’avoir entendu & examiné ; parce que c’est le mesme cas. Je puis dire aussi : nostre loy ne condamne personne sans avoir entendu son procez & examiné ses actions ; parce que ces deux cas sont tous deux aprés leur verbe.
Quand les mots sont synonimes, on ne répéte point les particules, par exemple, je diray : Le Fils de Dieu est venu pour racheter les hommes & les delivrer de la servitude, & non, & pour les delivrer ; parce que racheter & delivrer sont la mesme chose, nos bons Auteurs sont fort exacts là-dessus.
