Les oeuvres poétiques de Clovis Hesteau de Nuysement 1578/Des globes Ætherez
LXIIII.
Des globes Ætherez le plus alme flambeau,
Laisse palir le teint de la toison doree :
Et tirant par degrez sa grand face adoree,
Redore la poictrine & le front du Taureau.
Jupiter espuisant son bien-heureux tonneau,
Rend la Terre en tous lieux de tous biens honoree,
Les Zephirs gracieux chassent le noir boree,
Et l'aube s'emperlant refait le jour plus beau.
Le l'hierre amoureux enguirlande le chesne,
Le rameau de Bacchus a son orme s'enchesne,
Et bref tout est content sous l'amoureuse loy.
Mais helas au destin la loy trop inhumaine,
Fait que mon beau Soleil rien qu'hiver ne m'ameine
Et qu'estant propre à tous n'est contraire qu'a moy.