Les oeuvres poétiques de Clovis Hesteau de Nuysement 1578/Amour pour se venger
V.
Amour pour se venger de ma rebelle audace,
Et punir en un jour mille crimes commis :
Reprit son arc douté, & ses traits ennemys,
Espiant de ma mort & le poinct, & la place.
Ma force s'estoit jointe à mon cueur ceint de glace,
Pour defendre mes yeux à la sienne sousmis :
Lors que le coup mortel jusqu'en l'ame transmis,
Grava dessus mon cueur les beaux traits de ta face.
Qui çà qui là dans moy la force & la raison,
Esperdument erroient yvres de sa poison :
Et sans me secourir s'efforçoient au contraire.
Ainsi mon cueur d'aimant s'amolit tout d'un coup,
Ma force & ma raison s'attacherent au joug,
Idolâtres du Dieu qui m'est plus adversaire.