Le Roman du Renart - D. M. Méon - 1826/4
Si coume Renart fist peschier à Ysengrin les anguiles.
Ce fu un poi devant Noël
Que l’en metoit bacons en sel,
Li ciex fu cler et estelez,
Et li vivier se fu gelez
Où Ysengrin devoit peschier,
Qu’en pooit par desus treschier,
Fors tant c’un pertuis i avoit
Qui des vilains faiz i estoit,
Où il menoient lor atoivre
Chascune nuit juer et boivre :
Un séel i orent lessiez.
Là vint Renart toz eslessiez,
Et son compere regarda,
Sire, fet-il, traiez-vos çà :
Si est là planté de poissons
Et li engin où nos peschons
Les anguilles et les barbiaus
Et autres poissons bons et biaus.
Dist Ysengrin, sire Renart,
Or le prenez de l’une part,
Sel’ me laciez bien à la qeue.
Renart le prent et si li neue
Entor la qeue au miex qu’il puet :
Frere, fet-il, or vos estuet
Moult sagement à maintenir
Por les poissons avant venir.
Lors s’est en un buisson fichiez,
Si mist son groing entre ses piez
Tant que il voie que il face ;
Et Ysengrin est sor la glace,
Et li séaus en la fontaine
Plains de glaçons à bone estraine.
L’iaue conmence à englacier,
Et li séaus à anlacier
Qui à la qeue fu noez ;
De glaçons fu bien serondez.
La qeue est en l’eve gelée
Et en la glace séellée.
Cil se conmence à soufachier,
Le séel quide amont sachier ;
En mainte guise s’i essaie,
Ne set que fere, moult s’esmaie.
Renart conmence à apeler,
Qu’ileuques ne volt plus ester,
Que jà estoit l’aube crevée.
Renart a la teste levée,
Si le regarde et les elz ovre :
Sire, fet-il, qar lessiez ovre,
Alons nos ent, biax doz amis,
Assez avons de poissons pris.
Et Ysengrin li escria,
Renart, fet-il, trop en i a ;
Tant en ai pris ne sai que dire.
Et Renart conmença à rire,
Si li a dit tot en apert,
Cil qui tot covoite, tot pert.
La nuit trespasse, l’aube criéve,
Li souleux par matin se liéve,
De noif furent les voies blanches,
Et mesire Costant Desgranges,
Un vavassor bien aaisié,
Qui sor l’estanc fu herbergié,
Levez estoit et sa mesnie
Qui moult estoit joiant et lie.
Un cor a pris, ses chiens apele,
Si conmande à metre sa sele,
Et sa mesnie crie et huie.
Renart l’oï, si torne en fuie
Tant qu’en sa tesniere se fiche.
Ysengrin remest en la briche,
Qui moult s’esforce et sache et tire,
A poi la pel ne li descire ;
Se d’ilec se veut departir,
De sa qeue l’estuet partir.
Que qu’Isengrin aloit tirant
Estes-vos un garçon corant,
Deus levriers tint en une lesse,
Voit Ysengrin, vers lui s’eslesse
Sor la glace tot engelé
A tot son hasterel pelé.
Cil l’esgarde, puis li escrie,
Ha ! ha ! le Leu ! ahie ! ahie !
Li venéor, qant il l’oïrent,
Tantost de la meson saillirent
A toz les chiens par une haie :
Adonc Ysengrin moult s’esmaie,
Car Dant Costant venoit après
Sor un cheval à grant eslès,
Qui moult s’escrie à l’avaler,
Lesse, va tost, les chiens aler.
Li braconier les chiens descoplent,
Et li brachet au Leu s’acoplent,
Et Ysengrin moult se herice.
Li venéor les chiens atice
Et amoneste durement,
Et Ysengrin bien se deffent.
As denz les mort : qu’en puet-il mès ?
Assez amast-il miex la pès.
Dant Costant a l’espée traite,
Et por grant cop ferir s’afaite.
A pié descendi en la place,
Et vint au Leu devers la glace ;
Par deriere l’a asailli,
Ferir le cuida, si failli,
Le coup li cola en travers,
Et Dant Costant chaï envers,
Si que le haterel li saine.
Il se releva à grant paine,
Par grant aïr le va requerre.
Or orez jà moult fiere guerre,
Ferir le cuida en la teste,
Mès d’autre part le cop s’areste,
Vers la qeue descent l’espée,
Tot rés à rés li a coupée
Près de l’anel, n’a pas failli ;
Et Ysengrin qui a senti,
Saut en travers et si s’en torne,
Trestoz les chiens mordent à orne
Qui sovent le tienent as naches.
Mès la qeue remest en gages
Dont moult li poise et moult li griève,
A poi que li cuers ne li criève.
Ne pot plus fere, torne en fuie
Tant que à un tertre s’apuie :
Li chien le vont sovent mordant,
Et il s’en va moult desfendant.
Qant il furent el tertre amont,
Li chien sont las, recréu sont,
Et Ysengrin point ne s’atarge,
Fuiant s’en va, si se regarde,
Droit vers le bois grant aléure.
Atant s’en va et dist et jure
Que de Renart se vengera
El premier lieu qu’il le verra.
Ici prent ceste branche fin,
Mès encore i a d’Isengrin.