Le Roman du Renart - D. M. Méon - 1826/17
C’est de la Jument et de Ysangrin.
Or vos dirai conment avint
A Ysengrin qant la nuit vint ;
Parmi ces bos s’en va corant,
Et si aloit ce porpensant
Que fox est li hons et li Leus
Qui onques va nule part seus
Puis qu’il puist avoir compaingnie,
Que mestier a souvent d’aïe ;
Et tiex puet-on acompaingnier
Dont l’en a puis grant enconbrier.
Qant ce pensoit en son corage,
Atant issi de cel boscage :
Une jument vit en un pré
Où ele pessoit près d’un blé.
Li Leus s’en va grant aléure
Droit au jument par la costure ;
Qant à lui vint, si la salue,
Diex saut, fait-il, Rainsant ma drue !
Et Diex vos saut, sire Ysengrin !
Dont venez-vos issi matin ?
Dame, dist-il, eschapez sui
De males mains où anuit fui :
Prestre Martin un engin fist
Por prendre moi et si me prist ;
Toute une nuit fui en prison.
Se i éusse un compaingnon,
D’iluec m’éust bientost jeté,
Por ce le vos ai raconté,
Se volez estre ma conpaingne,
Nos ferion moult grant gaaingne :
Assez vos donré à mengier
Duquel que auriez plus chier,
Ou bon froment, ou bone avaine,
Ou bone orge à quel que paine.
Vos m’auriez moult grant mestier,
Car je iroie por chacier :
No compaingnie seroit bele,
Car vos porpensez, Damoisele,
De cel vilain qui si vos tue
Et vos fet trere à la charrue :
Vos gaaingniez trestot son bien,
Ne vos n’en aurez jà rien
Fors le nouax que il aura
Et ce dont il cure n’aura.
Haï ! Rainsant ma douce amie,
Qar venez en ma conpaingnie,
Si serez fors d’autrui dangier,
Ne vos estovra charroier,
Ne çà ne là porter nul fais,
A toz jors mès vivrez en pais.
Sire Ysengrin, se je péusse,
Vo compaingnie chiere éusse,
Mès je ne puis corre n’aler,
Por ce voil-je ci pasturer :
De mon pié destre par deriere
Passai hier en une chariere,
Une espine me feri enz ;
Se la me traiiez as denz,
A nul jor ne seroit partie
De vos amor la druerie,[1]
Grant mestier vos porré avoir,
Qar je feré tot vo voloir,
Qar s’en vos velt gaingnons huer
Je sauré moult bien rejeter,
Mordre des denz, ferir des piez :
Qui consuivré toz ert jugiez ;
Cui ge porré bien asener
N’aura talent de regiber.
Dist Ysengrin, le piez mostrez,
Celui où l’espine sentez,
Tost la vos auré esrachie,
Jà mar i aurez autre mire.
Le pié li lieve, et il s’acrot,
O ses ongles li vuide tot.
Que qu’Ysengrin à vuidier brunche,
Et il le pié nestie et furche,
Rainsant le pié a destendu
Et Ysengrin a si feru
Entre le pis et le musel,
Tout coi le jeta el prael.
Rainsant s’en torne regibant,
Qeue levée va fuiant,
Et Ysengrin tot coi se gist
Grant piece après et puis si dist :
Haï ! maléureus chaitis !
Se j’oi hier mal, or ai hui pis ;
Ne me sai mès en qui fier,
Ne puis en nelui foi trover.
Issi se demente Ysengrin,
Ici prent ceste branche fin.
- ↑ Al. De vos la moie conpaignie.