Le Roman du Renart - D. M. Méon — 1826/22
C’est si conme Renart fu Tainturier.
Li Rois a fet son ban crier,
Par tot plevir et afier
Que qui porra Renart tenir,
Que ne le face à Cort venir,
Ne Roi ne conte n’i atende,
Mès erroment le prengne et pende.
De ce fu moult pou à Renart,
Fuiant s’en va en un essart ;
Son petit pas s’en vet avant
Et environ lui regardant :
N’est merveilles s’il se regarde,
Que de totes bestes a garde.
En son un grant tertre s’areste,
Vers Orient torne sa teste ;
Lors dist Renart une proiere
Qui moult est precieuse et fiere :
Ha ! Diex qui maint en Trinité,
Qui de tans perilz m’as geté
Et m’as soufert tans malz à fere
Que je ne déusse pas fere,
Garde mon cors d’ui en avant
Par le tien precieus conmant,
Et si m’atorne en itel guise
Et en maniere me devise
Jà ne soit beste qui me voie,
Qui sache à dire que je soie.
Vers Orient sa teste encline,
Grant cop se done en la poitrine,
Drece sa poue, si se seigne,
Va s’en le plein et la montaigne,
Mès de fein suefre grant destrece.
Envers une vile s’adresce
En la meson d’un tainturier
Qui moult savoit de son mestier,
Sa tainture avoit destrempée
Et au miex qu’il pot atrempée ;
Fete l’avoit por taindre en jaune.
Alé fu querre une droite aune
Dont il voloit son drap auner
Qu’en sa cuve voloit geter ;
Lessiée l’avoit descoverte
Et la fenestre estoit overte
Dont il véoit à sa tainture
Con ele estoit et nete et pure.
Renart dedenz la cort s’en entre
Por querre pasture à son ventre :
Le cortil a trestot cerchié
Et tot environ reverchié,
N’i pot trover rien qu’il menjuce.
Parmi la fenestre se muce,
Renart ne voit ame dedenz,
Il joint les piez, si sailli enz.
Esbahiz fu qant vit son ombre,
Oiez con li maufez l’enconbre,
Malbailliz fu et décéuz,
Car dedenz la cuve est chéuz ;
Au fons s’en va, pas n’i demore,
Isnelement resailli sore,
La cuve ot auques de parfont,
Par desus noe qu’il n’afont.
Atant estes-vos le vilain
Qui l’aune tenoit en sa main ;
Son drap à auner enconmence,
Qant il oï Renart qui tence
Por ce que issir s’en voloit,
Tant a noé tot s’en doloit.
Li vilains a drecié l’oreille,
Oï Renart, moult se merveille :
A terre gete toz ses dras,
A lui en vient plus que le pas,
Choisist Renart en la tainture,
A lui en vint grant aléure.
Ferir le volt parmi la teste
Qant il conut que ce fu beste ;
Mès Renart forment li escrie :
Biau sire, ne me ferez mie,
Je sui beste de ton mestier,
Si te puis bien avoir mestier ;
Sovent en ai esté lassé,
Si en sai plus que toi assez,
Encor te veuil assez aprendre
De mesler tainture avec cendre,
Qar ne sez conment en le fet.
Dist li vivains, ci a bon plet ;
Par où venistes ça dedenz,
Por qoi entrastes-vos çaienz ?
Ce dist Renart, por destremper
Ceste tainture et atremper :
C’est la costume de Paris
Et de trestot nostre païs.
Or est-ele moult bien à droit
Atornée tote à son droit.
Aidiez moi tant que je fors soie,
Puis vos dirai que je feroie.
Qant li vilains Renart entent
Et voit que la poe li tent,
Par tel aïr l’a sachié fors
Q’à poi ne li a tret del cors
Le bras, et trestout desciré,
A poi Renart n’en est desvé.
Qant Renart vit qu’il fu en plain,
Deus paroles dist au vilain :
Prodons, entent à ton afere,
Que je n’en sai à nul chef trere ;
Mès en ta cuve iere sailliz,
Par poi que n’i fui malbailliz,
Car si m’aït Sainz Esperiz,
Noiez i dui estre et periz :
Grant péor ai éu del cors,
Diex m’a aidié qant je sui fors.
Ta tainture est moult bien prenanz,
Jaunes en sui et reluisanz ;
Jà ne seré mès conéuz
En leu où aie esté véuz :
Moult par en sui liez, Diex le set,
Que trestoz li siecles me het.
Or remanez, car je m’en vois
Querre aventure par ces bois.
A icest mot de lui se part,
Fuiant s’en vet par un essart ;
Moult se regarde et se remire,
De joie conmença à rire.
Fors del chemin lès une haie
Vit Ysengrin, moult s’en esmaie,
Où il atendoit aventure,
Qar fain avoit à desmesure ;
Mès moult par estoit granz et forz.
Las ! dist Renart, or sui-ge morz,
Qar Ysengrin est fors et cras,
Et je de fain megres et las ;
Moult en ai soufert grant angoisse,
Ne cuit pas qu’il me reconoisse
Fors au parler ; ce sai-ge bien
Me conoistra sor tote rien.
G’irai à lui à quoi que tort,
S’orrai noveles de la Cort.
Lors se porpense en son corage
Que il changera son langage.
Ysengrin garde cele part
Et voit venir vers lui Renart ;
Drece la poe, si se seigne
Ançois que il à lui parveigne,
Plus de cent foiz, si con je cuit :
Tel poor a por poi ne fuit.
Qant ce ot fet, lors si s’areste
Et dist que mès ne vit tel beste,
D’estranges terres est venue.
Es-vos Renart qui le salue :
Godehelpe, fet-il, bel sire,
Non saver point ton reson dire,
Et Dex saut vos, bon dous amis,
Dont estes-vos ? De quel païs ?
Vos n’estes mie nez de France
Ne de la nostre connoissance.
Nai, mi seignor, mès de Bretaing,
Moi fot perdez tot mon gaaing
Et fot cerchier por ma conpaing,
Not fot mès trover qui m’enseing,
Trestot France et tot Engleter
L’encerchier por mon conpaing qer ;
Or vodrai torner por rester,
Ne sai mès où puisse querer :
Demore moi tant cest païs
Qu’i avoit trestot France pris.
Or moi voler torner arier,
Non saver mès où moi le quier,
Mès torner moi Paris ançois
Que j’aver tot apris françois.
Et savez-vos neis un mestier ?
Ouil, je serai bon joglier,
Mès je fot ier rober, batu,
Et mon viel me fu tolu ;
Se moi fot aver un viel,
Fot moi diser bon rotruel,
Et un bel lai et un bel son
Por toi qui fu sembles prodon.
Ne fot mangié deus jors entiers,
Or mengerai moult volentiers.
Conment as-non, dist Ysengrins ?
Moi fait aver non Galopins ;
Et vos, conment, sire prodom ?
Sire Ysengrin m’apele-l’on.
Et fot-vos nez en cest contré ?
Oïl, maint jor i ai esté.
Conment fu pelez cest païs ?
Il a non France, biaus amis.
Et saver-tu del Roi novel ?
Por qoi tu n’as point de viel ?
Non, un vassal de mon mestier
Si le m’a tolé avant ier.
Je fot savoir bon lai Breton
Et de Merlin et de Foucon,
Del roi Artu et de Tristan,
Del chievre foil[1], de Saint Brandan.
Et sez-tu le lai Dam Iset ?
la, ia, dist-il, godistonet,
Je fot saver, dist-il, trestouz.
Dist Ysengrin, tu es moult prouz
Et si sez moult, si con je croi ;
Mès foi que doi Artu le Roi,
Véis-tu donc, se Diex te gart,
Un ros garçon de pute part,
Un losengier, un traïtor
Qui envers nul hui n’ot amor,
Qui tot deçoit et tot engigne ?
Dam le Diex doinst q’as poing le tiegne !
Avant ier eschapa le Roi
Par son engin, par son boboi,
Qui pris l’avoit por la Roïne
Que devant lui tenoit souvine,
Et por autres forfez assez
Dont onc ne pot estre lassez :
Tant m’a forfet que je voldroie
Que il tornast à male voie.
Se gel’ pooie as poins tenir
Moult tost le convendroit morir ;
Li Rois m’en a doné congié
Et conmandé et chalangié.
Renart tenoit le chief enclin,
Par foi, fet-il, Dant Ysengrin,
Malvès lechieres, fox desvez,
Conment fot-il à non pelez ?
Dites nos conment il a non,
Fot-il donques pelez Asnon ?
Ysengrin rist qant il ce ot,
Et por le non d’Asnon s’esjot,
Moult l’amast mels que nul avoir.
Volez, fet-il, son non savoir ?
Oïl : conment fu-il pelez ?
Renart a non li desfaez :
Toz nos deçoit, toz nos engigne,
Dex doinst que as poinz je le tiegne.
De lui seroit la terre quite,
Sa part en seroit moult petite.
Toz fot-il malement tornez
Se tu le roz aver trovez :
Foi que devez le Seint martir
Et Seint Tomas de Chantarbir,
Ne por tot l’or que Dex aver
Ne fot voloir moi lui sambler.
Vos avez droit, dist Ysengrin,
Ne vos gariroit Apollin,
Ne toz li ors qui soit en terre,
Que jamès nos méussiez gerre.
Mès or me di, biax dous amis,
Del mestier dont t’es entremis
Sez-en tu tant servir à Cort
Que nul jogleres ne t’en tort,
Et que n’en soies entrepris
Par nul qui soit en cest païs ?
Par mon segnor Seint Jursalen
Ne fot itel trové oan.
Donques t’en vien avoques moi
Et je t’acointerai au Roi
Et à ma Dame la Roïne
Qui tant par est gente meschine,
Et je te voi et bel et gent,
Si t’acointerai à la gent :
Et se tu vels à Cort venir,
Je te ferai moult chier tenir.
Vostre merci, dist Galopins,
Je fot saver bons frecopins,
Si fot saver bon lecheri
Dont je sui moult à Cort cheri :
Se pot aver moi un viel,
Fot moi diser bon rotruel,
Et fot un vers dit de chançon
Por toi qui fot semble prodon.
Dist Ysengrin, sez que ferai,
Vien-t’en, une viele sai
Chés un vilain qui tote nuit
I asemblent si voisin tuit ;
A ses enfanz en fet grant joie,
N’est gueres nuit que je ne l’oie.
Par la foi que je doi Seint Pere
La viele est et bone et chiere ;
Se tu vienz avec moi à Cort,
Tu l’auras à qoi que il tort.
Atant se metent à la voie ;
Andui en vont et font grant joie ;
Dant Ysengrin asés li conte
Conment Renart li a fet honte,
Asez li conte en son françois :
Renart li respont en englois.
Tant sont alé qu’il sont venu
Triés la meson à un rendu,
Droit là ù Ysengrin savoit
Celui qui la viele avoit.
Dedenz le cortil au vilein
S’en entrerent andui à plein :
Le vilein ont moult redoté,
Lez le paroi sont acoté ;
Il vont escoutant tote nuit
Con li vilein fet son deduit.
Qant li dormirs le va matant,
Cochier s’en va de maintenant.
Ysengrin a drecié l’oreille,
Primes regarde et puis oreille,
Q’en la paroi un trou avoit,
Plus a d’un an qu’il le savoit,
Et par un ais qui ert fendue
Vit la viele au clou pendue,
Soflent et ronflent moult forment,
Tant que il se vont endormant ;
Un grant mastin gist lez le feu,
Delez la couche ot fet son leu,
Par un petit au feu ne touche.
Mès li essombres de la couche
Nel’ laissa véoir Ysengrin.
Frere, fet-il à Galopin,
Atent moi ci, g’irai véoir
Conment je le porrai avoir.
Tot fot moi sol, ce dist Renart ;
Conment es-tu donc si coart ?
Coart ! naï voir, mès g’ai péor
Par ci ne soit par cest contor ;
Se moi fot sol, jà fot portez,
Por ce fot moi desconfortez.
Ysengrin l’ot et si s’en rist,
Ses cuers forment li atendrist,
Et si li dist, en Deu amor
Onc ne vi hardi jugléor,
Hardi prestre, ne sage fame
Qant ele plus a, plus forsane,
Et qant ele a ce qu’ele velt,
Lors quiert ce dont ele se delt.
Ge dist Renart qui ainc n’ot loi,
Dant Ysengrin, en moie foi,
Se fot ici celui Renart,
Jà fot-il toz pendus à hart,
Tant fust engigneus et tant set,
N’éust pas poor, Diex le set.
Lessiez ester, dist Ysengrins,
Que je sai bien toz les chemins ;
Mès or te sié à ceste terre
Et g’irai la viele querre.
Lors s’en vint droit à la fenestre
Conme cil qui savoit bien l’estre :
Apoiée fu d’une corre,[2]
La nuit fu obliée à clorre.
Ysengrin fu montez en haut,
Par la fenestre laiens saut ;
Là droit où la viele pent
S’en va tot droit, si la despent,
Si l’a son conpaignon tendue,
Et cil l’a à son col pendue.
Renart se pense qu’il fera,
Conment il le conchiera :
Jà bien, fet Renart, ne m’aviengne
Se nel’ conchi, conment qu’il prengne.
A la fenestre droit s’en vient
Au bastonet qui la sostient ;
Le baston cline et ele clot,
Et Ysengrin laiens enclot :
Quida close fust par l’uisole.
Lors a grant paor de sa gole ;
Au saut que la fenestre fist,
Et à la noise s’esbahist
Li vileins qui ert endormiz.
Sailli en pié toz estormiz,
Sa fame escrie et ses enfanz :
Or sus ! il a larons çaienz.
Li vileins saut, c’iert sa costume,
Vient à son feu et si l’alume.
Qant Ysengrin le voit lever
Et il voit le feu alumer,
Un petitet se tret ariere,
Par les naches le prent deriere.
Li vileins a jeté un cri,
Li mastins l’à sempres oï,
Ysengrin prent parmi la c…,
Enpaint et tire et sache et roille
Trestot esrache quenqu’il pent ;
Mès Ysengrin moult bien se prent
Deriere as naches au vilain,
Mès de ce avoit le cuer vain,
Et sa dolor li engregnoit,
Qar li chiens ses c… tenoit.
Tant se sont laiens traveillié
Que Ysengrin ont escoillé.
Li vileins huche ses voisins
Et ses parenz et ses cosins :
Aidiez, por Deu l’esperitable,
Çaiens conversent vif déable.
Qant Ysengrin vit l’uis overt,
Et li vilein felun cuvert
A cuinnies et à maçues
Vienent poignant parmi les rues,
Entre la porte et le vilein
Fet Ysengrin un saut à plein,
Si fort le hurte qu’il l’abat
En une fange trestot plat.
Des quatre piez fiert à la terre,
Ne set son conpaignon ou querre ;
Par les vileins s’en va fuiant,
Et cil le vont après huiant.
Le vilein trovent en la boe
Grant et parfonde si qu’il noe ;
Fors l’en ont tret à moult grant paine,
D’un mois ne fu sa plaie saine.
Ysengrin pas ne s’aséure,
Fuiant s’en vet grant aléure ;
N’avoit cure de séjorner,
Ançois conmence à galoper.
El bois se met par une sente,
Moult est dolent, moult se demente
Por ce qu’il a perdu sa chose,
Mès à nului parler n’en ose,
Que se sa fame le savoit,
Jamès de lui cure n’auroit ;
Mès neporqant va s’en grant oire
Or ne se set mès en cui croire.
Tant va et vient Dant Ysengrins
Sentiers et voies et chemins,
Ulle et garment en son langage,
Par un petit que il n’enrage.
Tant fet qu’il vient en sa loviere,
Par l’uis s’en entre par deriere,
Sa mesnie trove laienz.
Dex soit, fet-il, o vos çaienz !
Ne parla guere hautement,
Mès tout basset et matement.
Dame Hersent estoit aaise,
Au col li saut, cent foiz le baise ;
Et si fil saillent, si l’acolent,
Juent et gabent et parolent,
Mès s’il séussent tot l’afere
Autre joie covenist fere.
Qant ont mangié à grant loisir
Si parolent d’aler gesir,
Et lors i ot moult, ce sachiez,
Paroles ainz qu’il fust cochiez.
Moult grant piece s’i arestut,
Et neporqant cochier l’estut :
Hersent la Love si l’enbrace,
Et lez lui se jut face à face ;
Et cil conmence à réuser
Et durement à reculer ;
Mès ne li vaut, si con je quit,
Encor orra tel chose anuit
Dont il n’éust jà nule envie,
Qu’il n’avoit cure de s’amie.
Hersent l’acole et cil se tret
En sus, n’a soing de son atret :
Et que est-ce, fet-ele, sire,
Avez-me-vos coilli en ire ?
Dame, fet-il, et que volez ?
Si faites ce que vos solez.
Je n’en sui mie ore aésiez,
Dormez-vos et si vos tesiez.
Fet Hersent, je ne m’en puis tere,
Ainz vos covient la chose fere.
Que fere va ? Ce que covient,
Ce qu’à totes fames avient.
Taisiez, fait-il, n’en ferai mie,
Or déussiez estre endormie
Et avoir dit vos patrenostre,
Que vigile est d’un Seint Apostre.
Sire, fet-ele, par Seint Gile
Jà n’i aura mestier vegile ;
Se vos volez m’amor avoir
Fetes en tot vostre pooir.
Dame Hersent forment le haste,
Et cil se torne et ele taste
Iloc où la c… soloit
Estre par reson et par droit,
Ne trova mie de l’andoille,
Chetis, fet-ele, où est ta c…
Qui ci endroit te soloit pendre ?
Tote la te covient à rendre.
Dame, fet-il, ge l’ai prestée.
A cui ? Une Nonein velée
Qui en son cortil me fist prendre,
Mès bien les m’afia à rendre.
Hersent respont de maintenant,
Sire, ce n’est pas avenant ;
S’il i avoit trente fiances,
Donés pleges et aliances,
Si lairiés les pleges encore.
Alés tost, ne finés de corre,
Et si dites à la Nonein
Que fille est au Conte Gilein,
Que plus rude mort n’i atende,
Mès tost vostre c… vos rende :
Qar s’une foiz l’avoit sentie,
Tost en aroit sa foi mentie
Ainz que jamès la vos rendist ;
Si seroit drois c’on vos pendist
Qant vos baillie li avez.
Bien voi que gueres ne savez,
Moult m’avez morte et maubaillie
Qant une autre l’a en baillie ;
Mise m’avez en grant effroi,
Demein m’en clamerai au Roi.
Pute vielle, dist Ysengrin,
Demein vos prengne male fin,
Car vos taisiez, si vos dormez,
Et mal jor vos soit ajornez !
Gardez bien que n’en parlez plus.
Atant Hersent del lit saut sus,
Fils à putein, mavès traïtres,
Einsi n’en irez-vos pas quites ;
Se ne m’estoit par un petit
Ge vos traisisse fors del lit,
Se Dex me doinst demein véoir.
Atant s’en vet à l’uis séoir,
Moult fort conmence à sopirer
Et ses cevols à detirer,
Ses dras deront, ses poins detort,
Plus de cent foiz s’ore la mort,
Cent foiz se pasme en moult poi d’eure,
Moult se maudit, moult se deveure.
Que ferai mès, lasse chetive !
Moult me poise que je sui vive,
Q’or ai perdue tote joie
Et la riens que je plus amoie.
Onques n’oi mès si grant anui :
Qu’ai-ge mès afere de lui ?
Fox est qui delez lui se couche,
Qu’il ne valt mès ne qu’une cuche.
Je ne quier mès o lui cochier
N’il ne doit à moi aprochier :
Qant il ne puet la chose fere,
Q’ai-ge donques de lui à fere ?
Mais aut Ermites devenir
Enmi un bois por Deu servir,
Qar bien sai qu’il est conchiez
Qant de la c… est desrochiez.
Il a perdu joie et baudor,
Hardement et barbe et color.
A icest dol qu’ele demeine
De gent fu tote la cort pleine :
En la meson en est entrée,
Au lit en vient tote desvée.
Or sus, fet-ele, Dant vileins,
Alez-vos ent à vos puteins ;
Ne sai où futes entrepris,
Mès bien en ont le gage pris :
Einsi doit-l’en mener celui
Qui sa fame a et prent l’autrui.
Ne set li las un mot repondre,
Ne contre lui n’en ose groindre.
Dame Hersent est noble et fière,
Et toz jors a esté legiere,
Cointe et plaine de grant orgoil.
Des quatre piez feri le soil
Et a torné le cul au vant,
A Deu, fet-ele, vos conmant,
Drece sa poe, si se seigne,
Vet s’en, conment que li plet pregne.