Le Livre des oraisons/XXX
XXX
Ne me delaisses doulz sires croistre en ma ignorance, et ne me laisses multiplier mes defaillemens, tu mas garde senz mes merites, de ma ioenesce jusque a la vieillesce, et a la decrepite ne me vueilles mie faillir. Trop de biens mas fais lesquielx seroit a moy doulce chose tous temps parler, et tousiours penser, et tousiours faire graces, par quoy ie te puisse devant tous les autres biens loer et amer de tout mon cuer et de toute marme. O tresbeneuree doulceur de tousceulz qui en toy se delitent sire le mien Dieu maiz ma imperfection ont tes oyeulx veu les oyeulx certes trop plus clers que le soleil regardant les voyes des hommes iusques es parfons dabysme et iusques es treshaulz cieulx. Tu sire ne me delaisses se ie ne te delaisse premier, ou que ie soye tu es tousiours aveques moy, ie confesse certes tout quant que ie fais devant toy, car tu le voyes trop mielx que ie qui le fais. Sire devant toy est tousiours mon desirer et ma cogitation. Tu vois lesperit et ou va et ou vient et ou est, et certes en toutes choses tu regardes plus lentention que leuvre, et quant toutes ces choses diligentement ie pense sire Dieu mien terrible et fort, de paour, et de tresgrant vergoingne ie suy confondu. Ie te suppli sire que tu vueilles regarder sur moy des oyeulx de misericorde et mes euvres perverses retourner en ta doulce voulente.