Le Livre des oraisons/XXIII
XXIII
Très doulx créateur et sur toute rien benigne redempteur fourmateur et réformateur mien ie retourne a toy à voix humble, suppliant ta souveraine pitié que tu enseignes le mien cuer à grant timeur et tremeur à penser en quant puante et avec quant plourable condicion ma char a pris la mort de lesperit par laquele aprésent est soustenue a pourreture et a vers. Ou sera lors ma biaulte se ie nay nulle. Ou seront les granz déliz ou ie me suy delite en mon temps ? Mes oyeulx se clorront dedanz la teste retournes, par lesquelx de vainnes et miserables vocations souvent me delitoye, ilz gerront de horribles tenebres couvers, lesquielx ore par leur lumière sesleescent de puisier en vanités ; ouvertes seront les oreilles tantost remplies de vers, lesqueles ore avec dampnable esleescement voix de détraction et seculiers rumeurs reçoivent ; restraindront se les denz miserablement serrées ; lesqueles ore ont large gulosite.
Les narines pourriront qui ore se delitent en diverses odeurs. Les levres laides et puantes et horribles se monstreront qui souvent par fol escharniment sesleescoyent a faire dissolutions. La langue sera lyee de corrompue salive qui tropes vaines et fausses paroles parloit restraindrace. La gorge et le ventre seront saoules de vers, lesquielx trop souvent en diverses viandes et beuvrages se sont delites. Par quoy conteray toutes choses a celle composicion du corps, a la sante au proufit ou delit duquel auques toute notre cure veille, et satent en pourreture et en vers et, au derrenier, en vil pouldre se retournera. Ou est le col esleve, ou est vautance de paroles, ournement de vesteures, vatiete de delices, force, legeresce, seigneurie, richesce, ainsi comme un songe sest tout esvanouy, passees sont toutes choses et de cy en avant ne retourneront et celluy qui les a eues meschin ont laissie. Helas doulz Dieu ie te cri merci que puisque il ta pleu à moy donner la cognoissance des choses dessus dictes il te plaise a moy donner la cognoissance de lusaige de ceste vie en tele maniere que a toy ie puisse venir.