La Source et origine des cons sauvages/08
LE BAIL NOTABLE
ET EXCELLENT POVR
TOVS CEVX,
Qui ont vouloir de bailler & liurer ſemblable
choſe (y contenue) Sents & Rentes d’vne ieune
Dame aux beaux yeux, de ſon deuant, qu’elle
conſtitue aux Sents & Rentes, deuoirs proprietez
conuenable cy apres mentionnées &
declarées audict preſent Bail-à-Ferme. Qui
s’enſuit cy apres.
VT preſenté en ſa perſonne,
Dame de Ieuneſſe aux Beaux
Yeux, grande Maiſtreſſe de ſon
Con, & grande Dame de la Sauſſaye
qui piſſotte. Laquelle confeſſe
avoir baillé, & s’ofre en laiſſer ioüir
à toute heure, à tiltre de croiſt &
de ſents, à Simphorien de la Feſſe,
maiſtre aprenty de remuëer trippes,
demeurant à ſainct Sanxon, à ce
preſent preneur audit tiltre de ſents,
pour luy & pour tous ceux qui voudront
habiter au lieu Seigneuryal cy
aprés declaré.
C’EST aſſauoir, un Con, en tous
ſents, deuëment borné, & bordé
par voyes & ſentier, Ainſi qu’il ſe
pourſuit de toutes ſes ſuperfluitez,
à preſent exempt de toutes parts,
aſſis au lieu de la Motte, ſoubs le
Ventre : qui ſe conſiſte en la grand
ſalle, cuiſine, pluſieurs Chambres,
& gardemangers, tant d’Hyuer que
de l’Eſté, court, iardin, fumé & en
toutes ſaiſons cloyſonnez de pluſieurs
& riches Tapiſſerie, d’or iaune
& changeant. Eſquelles Chambres
ſont les meubles qui s’enſuyuent.
Assavoir, à l’entrée vne barre d’or gliſſant, vn entre pet ridé, legimbendaut pelé, le grand caquenard, le trou remmanché tout à neuf & la ballole rabattuë forte, & puiſſante, & és enuirons du dict lieu, taillis à tondre quatres fois l’an pour le moins ſans les balliueaux pendans par les racines, & l’aiſance au puit profond qui ne tayriſt iamais, ains fourniſt à boire aux voiſins ordinairement. Le tout contenant deux quartiers en montaigne, & deux arpens en vallées obſcures & tenebreuſes, tendant d’vne part à la ruë de Mordelle, & d’autre part aux deux cuiſſes, aboutiſſant d’vn bout par le bas à la fente & corne du Cul, pres la ruë des Feſſes, d’autre bout au petit ventre, le grand ſentier entre deux. Et en la cenſiue de M. Culton & chargé enuers luy de ſents, & rentes qu’il doit, ſans autres charges que celles cy apres. Lequel ſents ledict Seigneur de Culton, & du grand Cul, ſera tenu ſouffrir & endurer paſſer les eauës & immondices dudict Con, ſans pour ce faire aucune diminution dudict Sents : à la charge auſſi que ledict preneur ſera tenu labourer, cultiuer autres ſubſtances, & entretenir de fonds en riue ledict Con, en ſi bon eſtat, labeur & valeur, que ledit ſens s’y puiſſe prendre, engaiger, bailler à autres ſents, n’y autrement aliener ne tranſporter partie ne portion dudict Con, ſents le tout. Mais de tout iceluy Con eſlargir, croiſtre, augmenter & non diminuer, le ramonnant, fourbiſſant & ſubſtantant ſouuent, de iour en iour, & d’heure à autre, ainſi qu’il eſt bien requis & tres-neceſſaire. Et où le preneur voudroit laiſſer le dit lieu, & s’en trouue trop chargé & lasé, ſera tenu le rendre en ſubſtance, bon eſtat & deu, auec les vſtencilles & meubles cy apres declarées, autres menues drogueries qui ſe pourront trouuer. Et pour ſeureté dudit Sents & entretenement & reſtitution, ledit preneur alié & obligé vn lieu appellé Couillard, garny de deux bonnes pieces fortement encloſes, auec la forte & ronde lance, dont il à accouſtumé combatre. Et ſi accordé par ce faiſant, qu’il ſera tenu ſouffrir en l’vne des Chambres dudict Con, & lieu baillé à Sents, loger les pauures aueugles qui y voudront habiter, en y faiſant par eux à l’entrée amende honorable a deux genoux, teſte dechaperonnée, la torche au poing, en baiſant ledict Con, auſſi le plus dignement que frire ſe pourra ſelon la dignité dudict lieu. Leſquels aueugles ſeront tenuz deuant que de ſortir, pleurer, & laiſſer la bource vuide, pour recompenſe & bon ſentiment qu’ils auront reçeu en iceluy lieu, fluſtes & ioyeux inſtrumens qui les ont fait dancer : Car ainſi a eſté accordé : autrement ne ſe fuſt le marché faict entre leſdictes parties, qui à l’entretenir ſe ſont ſub-mis, à peyne de trois fois le jour amaſſer les gringuenaudes tombant du taillis eſtant des deſpendances de la Seigneurie du Cul, & lieu baillé à Sents, par celuy qui contreuiendra à autre ſubſtance dudict Bail. Qui fut paſſé en preſence du Seigneur de la Veſſieres, Colin Mordant, gros Iean le Morfondu, Guillemin croqueſolle, Thibaut Garot, & vn Venerable Docteur (en Cornardiſe) duquel ie ne ſçay le nom, ie m’en enquerray, en dormant. Le Mardy gras apres fouper. L’an mil dict iamais. Auſi ſigné, Baiſe mon Cul, Et garde bien le trou.
