La Chasse (Gaston Phœbus)/Chapitre XXXVIII
(p. 151-152).
Chapitre trente-huitième.
Ci devise comment l’asemblée se doit fere en esté et en yver.
a quelle asemblée se fet en cieu manière : la nuyt devant que le seigneur de la chasse ou le meistre veneur voudra aler en boys, il doit faire venir devant luy les veneurs, les aydes, les valetz et les pages, et leur doit à chescun assigner leurs questes en certain lieu et séparé l’un de l’autre ; et l’un ne doit point venir sur la queste de l’autre ne faire annuy. Et chescun doit quester en la manière que j’ay dit du mieulz qu’il puet ; et leur doit assigner le lieu où l’asemblée sera au plus aisé de tous, et au plus près de leurs questes. Et doit estre le lieu où l’asemblée sera en un biau pré bien vert, où il y ait biauz arbres tout autour l’un loinh de l’autre, et une fontaine clere ou ruissel de lez. Et s’apelle asemblée pour ce que toutes les gens de la chasse et chiens si asemblent ; quar ceulx qui vont en queste doivent tous revenir au certain lieu que je di ; aussi font ceulz qui partent de l’ostel ; et tous les officiers de l’ostel doivent là porter chescun ce que li faut selon son office et bien plantureusement et doivent estendre touailles[1] et napes par tout sur l’erbe vert et metre viandes diverses et grant foyson dessus selon le povoir du seinheur de la chasse. Et l’un doit mengier assis et l’autre sur piés, l’autre acouté, l’autre doit boyre, l’autre doit rire, jangler et bourder et jouer ; et brief tous esbatemens et leesses. Et quant on sera assis ès tables avant que on mengisse, donc doivent venir les veneurs, aydes et valletz de chiens qui auront esté en queste. Et chescun doit fere son raport de ce qu’il hara fet et trouvé et metre les fumées devant le seinheur celuy qui en hara. Et le seinheur, ou le meistre de la chasse, par le conseil de eulz tous doit regarder auquel il ira leissier courre, ne lequel sera plus grant cerf ne en meilleur muete. Et quant ilz aront mengié, le seinheur doit deviser ou les releis et levriers et deffenses vont, et autres choses lesquelles je dirai plus à plain quant parleray du veneur. Et puis doyvent le seinheur et les autres monter à cheval et aler leissier courre.
- ↑ Touailles, toiles.