Dictionnaire des Arts et des Sciences/1re éd., 1694/Legion
LEGION. s. f. Corps de gens de guerre dans la Milice Romaine, qui estoit composé ordinairement de cinq à six mille hommes d’Infanterie & de quatre à cinq cens Chevaux. Acad. Fr. La Legion, dans le temps de Romulus, estoit de trois mille hommes, & on les divisoit en trois ordres de bataille. Elle estoit de quatre mille hommes sous les Consuls, & elle fut de cinq ou six mille hommes depuis Marius & divisée en Cohortes, chaque Cohorte de cinq ou six cens hommes, selon que la Legion estoit de cinq ou six mille ; ce qui faisoit dix ou douze Cohortes dans une Legion. Outre les Legions composées des Citoyens Romains, qui faisoient comme un Corps separé, il y en avoit une autre de Cavalerie & d’Infanterie qui estoit des Alliez, & qu’on appelloit Extraordinaire. Les gens de pied avoient divers noms dans les Legions Romaines. Ceux qu’on appelloit Velites, ce qui veut dire Prompts & legers, avoient pour armes une longue épée, une lance de trois pieds de long, & de petits boucliers ronds, qu’ils nommoient Parma tripedalis. Une espece de bonnet fait de cuir ou de la peau de quelque animal leur couvroit la teste. Ils appelloient Galea cette sorte de bonnet, qui ne differoit que dans la matiere de ceux qu’on nommoit Cassis, & qui estoient de metal. Ces Velites, parmy lesquels on comprenoit ceux qui lançoient le dard, les Archers & les Frondeurs, estoient choisis ordinairement pour suivre la Cavalerie dans les plus promptes & les plus dangereuses entreprises, comme estant les Soldats les plus dispos de toutes les Troupes. Il y en avoit d’autres qu’on appelloit Hastati, Principes & Triarii. Ils portoient un bouclier long de quatre pieds & large de deux, & avoient une longue épée à deux tranchans & ferme de pointe, avec un casque d’airain, & sa creste de mesme matiere, une espece de bottes dont le devant de la jambe estoit couvert, deux javelines, l’une plus grande qui estoit ronde ou quarrée, & l’autre plus petite. Leurs corselets estoient de fer ou d’airain & de diverses façons. Ceux qu’on appelloit Lorica hamata, estoient faits de petites mailles ou par petites écailles. Les armes de la Cavalerie estoient pour les offensives une javeline & une épée, & pour les défensives un casque, un écu & une cuirasse.